[Kobus Strydom]
Wonder jy wat jy kan doen om beter punte te kry?
Ek het met twee van die toppresteerders in graad 8, Daneel Laubscher en Izabelle Visser gesels om te hoor wat hulle doen om sulke goeie punte te kry.
Volgens Daneel is dit baie belangrik om gereeld te leer, maar hy erken ook dat almal deur fases gaan waarin hulle nie wil leer nie. Dit is belangrik om jou vermoëns te verstaan en te onthou dat jou beste genoeg is.
Moenie bang wees om unieke leermetodes te gebruik en met verskeie metodes en hulpbronne te eksperimenteer nie. Daneel lees sy werk hardop en neem dit met sy selfoon op. Hy luister dan weer na die opname, terwyl hy loop. Izabelle maak weer opsommings, notas en ook stemopnames waarmee sy leer.
Hoe hanteer die toppresteerders spanning? Daneel beperk homself tot wat hy weet hy kan doen. Verskillende mense het verskillende vermoëns en dit is belangrik om volgens hierdie vermoëns te leer. Daneel weet, byvoorbeeld, dat hy net een uur per dag hoef te leer.
Hoe bestuur hulle hul tyd? Izabelle doen eers sport en dan haar werk en sy probeer om lank voor toetse en eksamens te begin leer. Daneel probeer om gereeld te leer, maar hy erken dat hy soms nie in staat is om na sy naskoolse aktiwiteite te leer nie.
Ken jou vermoëns en soek vir alternatiewe leermetodes wat dalk beter vir jou sal werk. Moenie toelaat dat stres in jou pad staan om jou doelwitte te bereik nie.
Onthou om net jou beste te probeer; jou beste is genoeg.
Kobus Strydom
Kobus se gunstelingvakke is natuurwetenskap en Afrikaans. Hy neem aan debat, skaak en hokkie deel. Hy versamel ook munte.